Abstract
Ko te mātāmua tēnei o ngā rangahautanga Atuatanga me ōna ihoatua kapahaka, ka mutu he tuatahitanga ā-tuhinga kairangi ki te reo Māori ki tēnei horopaki puta i te motu. Ko te pou tāhuhu o tēnei rangahau ko te Atuatanga. Ko tōna matū ko te reo Māori, ko te hira o te wairuatanga, ko te Atua Karaitiana, ko ngā atua Māori, ko ngā poropiti Māori me te whakatairanga i ngā hononga tapu i waenganui i ngā tikanga Māori me ngā ihoiho o te Paipera Tapu. Ko ngā pou matua e toru e tokona ai tēnei whare rangahau ko ngā ihoatua o te kupu, o te waiata, me te tū a te kaihaka. Katoa ēnei he pou wetewete i ngā titonga waiata tira, waiata hīmene, whakaeke, mōteatea, waiata ā-ringa, poi, me te haka anō hoki. Ko tāku e totohe nei, kua roa te Atuatanga me te kapahaka e noho wehewehe ana i te ao rangahau Atuatanga. Ko te kupu whakarite i tēnei momo wehenga ko te kapahaka kei te tara iti o te whare, ā, ko te Atuatanga kei te tara nui. Nā reira, ahakoa e tū tahanga ana ēnei kaupapa kāmehameha a te Māori i ēnei rangi nei, kua tae ki te wā e ōkawa ai ōna hononga puiaki ki te ao mārama. Kua roa te Māori e whakairo ana i ōna ihomatua mā roto mai i āna titonga huhua. Ko te mate, kua noho mātāmuri ngā titonga a te Māori me ōna ihoatua ki ngā mātanga, ki ngā kairangahau Atuatanga auraki o Aotearoa, otirā o te ao. Kua neke atu i te rua rau tau te Māori e whakatairanga ana i ngā ihoatua o te kapahaka, ā, kua tae ki te wā e whaimana ai te kapahaka hei kaupapa Atuatanga tūturu. Ka mairangatia te tikanga rangahau kaupapa Māori e tēnei tuhingaroa hei taupunga whakaū i ngā mātāpono me ngā tikanga taketake a ō tātou mātua tīpuna. Kua whakaōkawatia e au ngā titonga 15 nō ngā iwi me ngā kaitito puta i te motu hei rauemi, hei raukura mā ngā uri kei te whanake. Ko ngā kōrero kura o tēnei rangahau he whakanui i te Atuatanga, arā ngā hononga tapu i waenganui i te ira tangata me te Atua me te whakaū anō i a tātou ki te Paipera Tapu hei tohutohu, hei taunaki i a tātou, i ā tātou mahi, i a tātou e whakamomori nei i tēnei ao horihori, i tēnei ao matemate.