He Takapau Whāriki, He Takapau Tuhikura - A reflection on the intergenerational knowledge transmission of moko konohi through the eyes of a mokopuna

Ko te aroka nui o tēnei kaupapa rakahau, ko te āta arohaehae, ko te āta parahau i kā kōrero mō te moko konohi ki tā te mokopuna tirohaka, ko te āta hōmiromiro i te whakapapa o te moko konohi, ā, ko kā pakirehua nui, nō maimai rawa tēnei tūāhuataka, te moko konohi, nō moroki noa rānei. Katoa rā, he mea nui ēnei pātai, e tino mārama ai te iwi Māori ki te whakapapa, me te anamata o te moko konohi e ai ki tēnei takapau tuhikura. Ko tā te tuhikura nei, he waniwani haere me te āta kite atu i te whai pāka ki te ahurea Māori me tōhona noho ki tēnei ao hurihuri. He kapo haere i kā whakaaro o ētahi kaiwhiwhi moko konohi hai taunaki i kā kōrero i te tuhikura nei. Mātua rā, e whai wāhi ana kā kōrero a ētahi rika whao moko. Ki te kore ko te momo pūkeka i ēnei rika whao, ko kore noa e kite i te moko konohi e hōrapa haere ana, e rakiwhāwhā haere ana, ko kore noa e kite i te whakarauorataka mai o te moko konohi.