Abstract
He ātetenga ngā kōhanga reo, he ātetenga hoki ngā kura kaupapa Māori ki te tāmitanga o ngā kura i Aotearoa me te pēhitanga o te reo Māori. He ātetenga tēnei mai i waho i ngā kura, mai i waho hoki i te pūnaha Pākehā. Ko te reoruatanga, ko ngā karaehe rumaki tētahi ātetenga mai i roto i ngā kura, mai i roto hoki i te pūnaha Pākehā.
Nā ēnei kaupapa whakarauoratanga reo, kua ūkaipō anō te reo i roto i ngā whānau, i roto i ngā hapori, i roto i ngā iwi. Kua whai tuakiritanga Māori, i te hononga o te reo ki te ao Māori. Nā whai anō kua whai oranga ngā whānau, ko ngā hapori, ko ngā iwi hoki. Kua ea ētahi o ngā moemoeā o kui, o koro mā. Heoi anō, kua tata ki te toru tekau tau te roanga o ēnei momo hōtaka, o ēnei momo kura. Kua puta mai ngā ākonga, kua whai angitū, engari he aha i angitū ai? He aha i whai hua ai? He aha hoki i wero ai? He iti te puna rangahau e pā ana ki ngā wheako o ēnei ākonga ka puta. Kua ngū ō rātou reo.
Ko te kaupapa o tēnei rangahau ko te whakaputa i te reo o ngā ākonga tokoono ka puta mai i Te Kura Reorua o Maraenui i Ahuriri me ō rātou wheako i roto i te reo. He pūrākau tuakiritanga, he pūrākau reo. He kaupapa panonitanga, otirā, he pūrākau oranga.